ــــــــــــــــ بحضورِ ـــــــــــــــــ
پُورِ بتول، وارثِ شانِ رسولؐ،
سیّدُالشُّہداء، سیّدنا امامِ حُسینؑ
حُسینؑ، گُلشنِ تطہیر کی بہارِ مُراد
حُسینؑ، غیرتِ اسلام، آبرو ایجاد
شعارِ مصطفویﷺ، جس کے فکر کی بنیاد
شعورِ دینِ محمدﷺ، حُسینؑ کا ارشاد
ہجومِ، لشکرِ باطل، سپاہِ ابنِ زیاد
حُسینؑ، حق کے نگہبان! ہر چہ بادا باد
فزود ز اشکِ اسیراں، شماتتِ صیّاد
بزادگانِ بہاری درِ قَفس نہ گُشاد
وزید دَر چمنِ کربلا، نسیمِ کرم
خرامِ نگہتش ایزد بہ دُشمناں مرساد
یزید، قبر کی ظلمت، حُسینؑ نُورِ زمیں
حُسینؑ، علم و عدالت، یزید، استبداد
حُسینؑ، وارثِ خیر و یزید وارثِ شَر
حُسینؑ، عشق و متانت، یزید، جَہل و فساد
حُسینؑ، فرحتِ اہلِ وفا، دمِ اِیفا
یزید، ماتمِ اہلِ رِیا، پسِ بیداد
کہیں ہے ظلم و تشدُّد، کہیں ہے صبر و رِضا
کوئی نشاط میں غلطاں، کسی کا گھر برباد
حَسنؑ، حُسینؑ کی توصیف، مختصر یہ ہے
نقیبِ امن و نگہبانِ عظمتِ اجداد
یہ گود وہ ہے کہ جس میں پَلی حُسینیّت
جنابِ سیّدَہؑ کو دیجیۓ مبارَک باد
اجَل کی دھوپ میں اُس کا وہ سجدۂِ آخر
وہ تشنگی، وہ تمازت، وہ تیغۂ جلّاد
ہر امتحان میں شبّیرؑ کا یہ حال رہا
خُدا کا ذکر، خُدا سے وفا، خُدا کی یاد
یہ حدّ ِ ظرفِ خرد، کم نظر نے مان لیا
سمجھ تو آئی ہے، لیکن بہ قدرِ استعداد
سِکھا گئے ہیں زمانے کو حُرّیت کا سبق
حُسینؑ، عزم و تدبُّر کے بے نظیر اُستاد
نَفَس نَفَس ہے نگاہوں میں شیوۂ تسلیم
نہ کوئی فکرِ اقارب، نہ کچھ غمِ اولاد
خُدا کی راہ میں عزمِ حُسینؑ کا کیا کہنا
اِس اہتمام سے کرتا ہے کون، گھر بر باد
وہ جن کی ماں ہیں، محمدؐ کی بِنتِ نیک اختر
وہ جن کے باپ ہیں خیرؐالانام کے داماد
لرز لرز کے فنا ہو گئی یزیدیّت
حُسینیّت نے ہِلا دی غرور کی بنیاد
ہر اِک ستم کا ہدف تھے، حُسینؑ ابنِ علیؑ
وہ ظلم وہ جورِ مسلسل، وہ دم بہ دم اُفتاد
خلافِ اہلِ تعدّی، جہاد واجب ہے
یہ دے گیا ہے پیام، ایک بندۂ آزاد
زہے کرم، بمن آورد بُوئے خاکِ درش
بود ہمشہ بشارت گہِ صبا، آباد
ہزار ہا صَلَوات و ہزار تسلیمات
بروحِ سیّدِﷺ کونین و آلہِ الامجاد
ؔنصِیرؔ کیوں نہ ہو ایسے امامؑ کا پیرو
کہ سر بِداد و بدستِ یزید، دست نداد ۔
فرمُودۂ الشیخ سیّدپِیرنصِیرالدّین نصِیرؔ جیلانی،
رحمتُ اللّٰه تعالٰی علیہ، گولڑہ شریف
بیادِ بندۂ نصِیرؔ شاہد محی الدینؒ
از خالد شاہم، عابد محی الدّین ۔
