میں کیا ہوں معلوم نہیں

 میں کیا ہوں معلوم نہیں

میں نے ظلم سہے لیکن

میں پھر بھی مظلوم نہیں​

میں مستی کا ساغر ہوں

ہوش سے میں محروم نہیں​

میں مسجود ملائک ہوں

میں راقم مرقوم نہیں​

میں مخلوق کا خادم ہوں

کون میرا مخدوم نہیں​

جیتے جی مرجاتا ہوں

مرکے میں معدوم نہیں​

میں نے کیا کیا دیکھا ہے

میں یونہی مغموم نہیں​

میں صحرا کی جان ہوا

میں بادِ مسموم نہیں​

میں مایوس نہیں لیکن

امید موہوم نہیں​

🔥

واصف علی واصف