دل بضد ہے کہ اُسے چُھو کے سراہا جاۓ

 دل بضد ہے کہ اُسے چُھو کے سراہا جاۓ

آنکھ کہتی ہے اُسے دُور سے چاہا جائے

                                                 

تُو یہاں بیٹھ مِرے جسم، اُسے مل آؤں

یہ نہ ہو تُو بھی مِرے ساتھ گُناہا جائے   

دشت چھوٹا ہے تڑپنے کی جگہ تھوڑی ہے

تیرے بیمار سے کُھل کر نہ کراہا جائے

                                                 

کیا خبر ایسی کوئی شام زمیں پر اُترے

جب دِیا ٹوٹی ہوئی شب سے بیاہا جائے    

                                              

جس طرح بھی ہو مِرے دل سے نکالو اس کو

یہ نہ ہو عشق مِرے ساتھ نکاحا جائے 

                                                  

میں محبت کے خرابے سے نکل آیا ہوں

اب کسی موڑ پہ بھی مجھ کو نہ چاہا جائے

آخری بات کہ اب تُو نے بھی ٹھوکر ماری

اب کہاں عشق تِرا ہجر پناہا جائے

میٹم علی آغا