جس نے سمجھا عِشقِ محبُوبِ خدا کیا چیز ہے

 جس نے سمجھا عِشقِ محبُوبِ خدا کیا چیز ہے


وہ سمجھتا ہے دُعا کیا، مدّعا کیا چیز ہے



کوئی کیا جانے کہ شہرِ مُصطفٰےؐ کیا چیز ہے


پوچھیے ہم سے کہ طیبہ کی ہَوا کیا چیز ہے



شافعِ محشر کے دامن میں چُھپا بیٹھا ہُوں مَیں


کیا خبر ہنگامۂ روزِ جَزا کیا چیز ہے



ہر مَرَض میں خاکِ راہِ مُصطفٰےؐ ہے کارگر


سامنے اکسِیر کے، کوئی دوا کیا چیز ہے



دِل مُعطّر ہو گیا آنکھیں مُنوّر ہو گئیں


ﷲ ﷲ، سبز گُنبد کی فَضا کیا چیز ہے



یہ سمجھنا، ہم نے سمجھا ہے، شہِؐ لولاک سے


خَلق میں ٹُوٹے ہوئے دل کی صدا کیا چیز ہے



ہو گیا کیا مُطمئن دم بھر میں قلبِ مُضطرب


دیکھ لو ذِکرِ نبیؐ، یادِ خدا کیا چیز ہے



حشر میں تم کو گنہ گارو! پتا چل جائے گا


سایۂ لُطفِ مُحَمَّد مصطفٰےؐ کیا چیز ہے



رَحمتِ عالم، شفیعُ المُذنبیں، شاہِؐ اُمَم


ایک ذاتِ مُصطفٰےؐ ہے اور کیا کیا چیز ہے



زُلف و رُوئے مُصطفٰےؐ سے یہ کُھلا ہم پر نصِیرؔ


صبحِ گُلشن، بُوئے گُل، بادِ صبا کیا چیز ہے ۔